ПЕТАР ГЛУШКОВ

Живот и дело

Еден од најпознатите македонски печатари од почетокот на XX век.

Познат печатар, уредник и издавач на повеќе весници и книги поврзани со македонското прашање и публицист.

Се школувал во Солун каде што завршил гимназија, по што станал учител во Велес, а потоа во Ќустенџа, Романија. Одржувал блиски врски со Гоце Делчев кој го вклучил во револуционерното дело. Како претседател на Македонското друштво во Ќустенџа одлежал шест месеци затвор. По излегувањето од затвор, како делегат од Романија учествувал на првиот Македонски конгрес под претседателство н...

Познат печатар, уредник и издавач на повеќе весници и книги поврзани со македонското прашање и публицист.

Се школувал во Солун каде што завршил гимназија, по што станал учител во Велес, а потоа во Ќустенџа, Романија. Одржувал блиски врски со Гоце Делчев кој го вклучил во револуционерното дело. Како претседател на Македонското друштво во Ќустенџа одлежал шест месеци затвор. По излегувањето од затвор, како делегат од Романија учествувал на првиот Македонски конгрес под претседателство на Трајко Китанчев. Наскоро, неговиот дом станал сврталиште на видни македонски револуционери. Забележано е дека: „Глушков сторил многу дарувања и се истакнува како еден од најголемите донатори на македонската кауза“.

Бил уредник, соработувал или ги печател весниците: Странџа, Известник, Вечерна пошта, Политика, Учителска мисла, Македонски преглед, Современа мисла, Графически вестник и др. Целосно се оддал на новинарството по основањето печатница, најпрво во Варна, а потоа во Софија. Кај него се печатени изданијата: Извадоци (цели и скратени статии) од првите 20 броеви на ‘Револуционерен лист’ (1905), Движењето отаде Вардар и борбата со врховистите: по спомени на Јане Сандански, Черно Пеев, Сава Михајлов, Хр. Куслев, Ив. Анастасов – Грчето, Петар Хр. Јуруков и Никола Пушкаров (1927), Градот Велес (1929) од Христо Чочков, Моите стари соседи: раскази (1929) од Петар Завоев, Некогаш во Македонија (1886 г. – 1912 г.) (1931) од Васил Узунов, Спомени за Гоце Делчев (1935), понатаму: Учителот и народното здравје: принципи од современата хигиена (1906) од Петар Бонов, Песни на срцето и животот (1905) од Југо-Богдан, како и преводите на Дон Кихот (1910) од Мигел де Сервантес, Најмичка (Ратајкиња) (1929) од А. Тогобочни, Лаком Петар (1907) од Густав Иглер и др. Од неговата печатница излегле бројни изданија: белетристика, учебници, прирачници, стручни книги, речници, партиски документи; дела од Гогољ, Ги де Мопасан, Шекспир, Иван Вазов, Виктор Иго, Молиер, Хомер, Вилхелм Тел, Лидија Чарскаја и др.

Печатарската дејност на Петар Глушков имала значајна улога во ширењето и афирмацијата на науката и книжевноста во Македонија и во Бугарија. (С. К.)