Енциклопедија на македонската книжевност

Живот и дело

e современ македонски писател, раскажувач, романописец и есеист. Неговото творештво е уметничка и професионална симбиоза на литературата и музиката која се препознава во музикалноста и интелектуалната особеност на изразот во неговите дела. Крстевски остава печат и на полето на музиката како автор на текстот на антологиската песна „Еден бакнеж“, на македонската музичка легенда Нина Спирова.

Член е на Друштвото на писателите од 1989 година. Добитник е на наградите „Ѓурѓа“ (1991) за збирката раскази Нови ветришта над Равен и на државната награда за високи државни постигнувања „Мајка Тереза“ (2006).

Прозата на Крстевски е концепциски оригинална, повеќеслојна во изразот и во творечкиот пристап на темите. Неговите романи и раскази се креации во постмодернистички формат. Ликовите и настаните се локално и географски ограничени на местото Равен (Равенски етиди, Нови ветришта над Равен, Циганско лето). Равен е еден вид хронотоп изразен низ судбините на ликовите и нивните карактери. Мистификација и реалност која се испреплетува и раздвојува, имагинација која создава автентични описи, живи дијалози и стварност низ која се препознава македонскиот национален дух. Во низата раскази се вкрстуваат етно-географски, социјални и идеолошки семантички точки кои се во основата на приказните. Равен е центарот на националната сага, но и космополитска рамка на универзалната човечка судбина на вечно талкање и потрага по одговори за смислата на животот, како филозофија и како цел.

Секоја приказна од неговите раскази е врамена во цитат на почетокот од текстот, кој всушност се провлекува во целокупната идеја на текстот. Неговите творечки постапки се неконвенционални. Тој експериментира и со формата и со дискурсот. Во композицијата на неговите текстови се интегрирани (авто)биографски наративни линии, чести вонтекстовни алузии, анегдоти, цитати од познати книжевни и музички секвенци, но и сериозни рефлексии од повеќе науки.

Творечкиот интерес на Крстевски се познати и непознати димензии, автентични имиња и места, библиски ликови и мотиви, но и доминација на националниот дух и простор (како во студијата Карневалите во Македонија). Стилот на делата на Крстевски е повеќеслоен, со изразена ритмичност, со поетски кованици и архаични зборови кои му даваат на изразот исклучителна колоритност („тие се џимкаа и сакалдисуваа“, „го пизмеа дечиштата“, „се врцкаше везден“).

Со автентични постмодернистички пристапи, Крстевски ја отсликува типичноста на македонската социјална средина, поврзувајќи ја, според карактеристиките и односите меѓу ликовите, со глобални човечки типови и феномени на човечката егзистенција. Па така, „цитатната рамка“ на расказите прави тематски опсег од извадоци од народните песни и приказни, но и од Прличев, до Моцарт, Борхес, Еразмо Ротердамски, ведските списи, песните на Битлси и други. Всушност, тој ги создава своите приказни преку дијалог со други текстови, создавајќи поливалентност на делото и исклучително интелектуален авторски израз. (Т.Ќ.)

Повеќе

Автор

ХРИСТО КРСТЕВСКИ
8.III 1941, Струмица - 17.X 2013, Скопје
современа книжевност
автор расказ

Опус

Жестина. 1982. Скопје: Мисла (роман); Раскази од Равен. 1985. Скопје: Мисла (збирка раскази); Лавиринти. 1987. Скопје: Наша книга (есеи); Тереза Хум. 1989. Скопје: Мисла (роман); Циганско лето. 1990. Скопје: Македонска книга (роман); Нови ветришта над Равен. 1991. Охрид: Независни издавачи; Кралица на гроздоберот. 1992. Скопје: Култура (роман); Карневалите во Македонија. 1994. Скопје: Ктитор (студија); Виртуоз. 1994. Скопје: Ктитор (роман); Звучна игра. 1996. Скопје: Ктитор (роман); Гнила кобила. 2000. Скопје: Култура (роман); Rotten Mare. 2000. Скопје: Детска радост (роман); Времеубиец. 2001. Скопје: Ктитор (кратки раскази); Крајот на векот. 2002. Прилеп: Арлекин (есеи); Равенска трилогија. 2005. Скопје: Македонска реч (роман)

Библиографија

Стојчевски, Санде. 2011. „Расказите на Христо Крстевски“. Книжевно житие, бр. 25/26: 61-64.; Цветковски, Бранко. 2001. „Потрага по изненадите на земниот живот: кон поетскиот избор Небесна свадба од Смиле Наумоски-Брсјак; Робусен раскажувачки влог: за Христо Крстевски и за неговото творештво“. Стремеж, год. 47, бр. 11/12: 115-118.

Живот и дело

Опус

Библиографија

Контакт

Поважни линкови

ХРИСТО КРСТЕВСКИ

Живот и дело

Опус

Библиографија

Контакт

Поважни линкови