Енциклопедија на македонската книжевност

Живот и дело

Фолклористка, собирачка на народно творештво, филолог, научен работник со посебен интерес кон истражувањето на народната проза, особено на приказните.

Попвасилева го напуштила родното село поради Граѓанската војна во Грција во 1948 г., го прекинала образованието и заминала во Романија во прифатниот центар во Тулгеш. Подоцна завршила курс за учители и предавала македонски јазик на деца од прво до четврто одделение. Дипломирала на Филолошкиот факултет при Софискиот универзитет во 1958 година. Магистрирала на Филолошкиот факултет во Скопје, во 1975 г. со темата „Раѓањето на јунакот во народните приказни на јужнословенските народи“, под менторство на проф. д-р Кирил Пенушлиски. Докторирала на Филолошкиот факултет во Љубљана со темата „Двојазичното раскажување на народни приказни (влашко-македонски и македонско-влашки релации)“, под менторство на проф. д-р Милко Матичетов. По враќањето во Скопје во 1964 г. се вработила во НУБ „Св. Климент Охридски“, а од 1967 г. работела во Институтот за фолклор „Марко Цепенков“ во Скопје, каде го поминала најголемиот дел од својот работен век во научноистражувачка работа на народната проза. Нејзин посебен интерес се приказните, како и етнологијата и лингвистиката поврзани со родниот крај во егејскиот дел на Македонија, Грција.

Во рамки на фолклористиката, собирачката дејност на Попвасилева е објавена во неколку монографски трудови од областа на прозниот фолклор и депонирана во Архивот на Институтот за фолклор „Марко Цепенков“ во Скопје, од каде се користи за научни цели.

Повеќе

Автор

АЛЕКСАНДРА ПОПВАСИЛЕВА
1933, с. Куманичево, Костурско - 2022, Скопје
народно творештво
автор

Опус

Двојазичното раскажување на народни приказни (влашко-македонски и македонско-влашки). 1987. Скопје: Институт за фолклор „Марко Цепенков“; Македонците во Канада раскажуваат: Националниот идентитет и народната проза на Македонците во Канада. 1992. Скопје: Институт за фолклор „Марко Цепенков“; Македонски народни приказни од Костурско (изворни записи). 1996. Скопје: Институт за фолклор „Марко Цепенков“; Проблеми на народната проза. 1997.Скопје:Институт за фолклор „Марко Цепенков“; Толковен речник на одбрани зборови од костурскиот дијалект. 2005.Скопје: Институт за фолклор „Марко Цепенков“.

Библиографија

70 години Институт за фолклор „Марко Цепенков“ (1950 – 2020). 2020. Редакција д-р Зоранчо Малинов, д-р Катерина Петровска-Кузманова. Скопје: Институт за фолклор „Марко Цепенков“.

Живот и дело

Опус

Библиографија

Контакт

Поважни линкови

АЛЕКСАНДРА ПОПВАСИЛЕВА

Живот и дело

Опус

Библиографија

Контакт

Поважни линкови