Фолклорист, собирач на народно творештво, социолог на културата, научен работник од областа на фолклорот и етнологијата на влашкиот народ.
Ановска дипломирала на Катедрата за историја на уметноста со археологија на Филозофскиот факултет во Скопје во 1977 година. Магистрирала 1991 г. на Институтот за социолошки и политичко-правни истражувања при УКИМ. На истиот Институт докторирала во 1997 г. со дисертацијата „Социјално-фолклорни преплетувања во семејството и семејните односи кај Власите“. Од 1979 г. работи во Институтот за фолклор „Марко Цепенков“ како истражувач на фолклорот и етнологијата на влашкиот народ.
Во рамки на својата фолклористичка дејност, Ановска во повеќе наврати се ангажира во собирачка дејност. Нејзината активност е главно насочена кон собирање на фолклорни и етнолошки материјали врзани за влашкиот народ во Македонија и нивната традиционална култура. Голем дел од тие материјали се објавени во монографски изданија на авторката. (А. М.)