Енциклопедија на македонската книжевност

Живот и дело

Тој е еден од најплодните прозаисти, кој целиот свој опус тематски и амбиентално го посветил на историјата и современиот живот на градот Битола.

прозаист, романсиер и драмски автор.

Тој е еден од најплодните прозаисти, кој целиот свој опус тематски и амбиентално го посветил на историјата и современиот живот на градот Битола. Пишува за секојдневниот живот на човекот во општеството, насочувајќи го своето внимание кон трагичните судбини. Во основата на трагичното кај Костов е судирот, кој има етички и морални дилеми најчесто поради неприлагодената единка на општествената средина. Неговата ...

прозаист, романсиер и драмски автор.

Образованието го започнал во Битола, а во 1951 г. се запишал на Филозофскиот факултет, на групата Југословенска книжевност, на УКИМ во Скопје. Дипломирал во 1955 г. и се вработил во Радио-драмата на Радио Скопје. Во 1956 г. се враќа во родниот град, прво работи како професор по македонски јазик, а во 1964 г. бил избран за професор на Педагошката академија во Битола, каде работи сè до своето пензионирање. Бил еден од основачите на КУД „Илинден“ и негов долгогодишен уметнички директор. Бил главен и одговорен уредник на литературното списание „Развиток“. Во 1977 г. станува член на Друштвото за наука и уметност во Битола, од 1983 г. член на Друштвото на писателите на Македонија, a од 1988 г. член е и на Асоцијацијата на независните писатели на Македонија. Во 2016 г. е избран за почесен член на Македонската академија на науките и уметностите. Се занимавал и со истражување и проучување од областа на јазикот, литературата и писателската дејност.

Првата објава на Владимир Костов е романот „Лица со маски“ (1967) и оттогаш има плодна писателска дејност. Тој е автор е на 17 романи, на 7 збирки со раскази и на 10 книги за деца и млади, со што се потврдува оценката дека тој создал „прозен опус со епска димензија“ (Раде Силјан). Но не само квантитетот на неговото творештво туку и тематската преокупација со секојдневието, видено од еден прецизен забележувач и негов критичар, ја потврдува оваа констатација. Епската димензија на неговото творештво се огледа и во реалистичката постапка при сликањето на животните стории на ликовите, тип на роман во кој доминира епското. Имајќи го за предмет на интерес секојдневниот живот на паланката, тој, низ низата детални описи кои создаваат илузија на стварноста, успева да ја долови онаа атмосфера и оние начини на живот во кои единката, погодена од несовпаѓањето на сопствените идеали со опкружувањето, е опседната со немири, заблуди, страсти. Тие го деформираат погледот, а со тоа и психолошката стабилност, како што се покажува во едно од неговите најуспешни дела Свадбата на Мара.

Преку прозните остварувања на Костов се доживува душата на градот Битола. Посебна атмосфера даваат најтесните сокачиња, Ат-пазарот, асфалтот под кој сè уште се слуша галопот на коњите, Старата чаршија со занаетите кои изумираат, приказните за Александар Турунџев. Делото на Костов, гледано во целина, е посебна книжевна хроника на Битола и на нејзините општествени и духовни движења (Црквичето Четириесет маченици во Битола; Вујко; Грешниот Захарие, Битолски триод, Хераклејски мозаик, Дива мисла).

Битолски триод зборува за Балканските војни и за Првата светска војна, и со тоа, заедно со Петре М. Андреевски, е еден од ретките автори посветени на оваа тема. Во него се тематизира трагичната судбина и крвавата поделба на македонскиот народ, како и двегодишното бомбардирање на артилеријата на сојузничките сили на градот Битола и употребата на бојни отрови, при што се дава слика на еден своевиден геноцид на населението во Битола и на ретките монументални градби на познатиот Широк сокак.

Религијата има значајна улога во конципирањето на идеите кај Костов и имаат функција на освестување на границите меѓу доброто и злото. Оттука, моралот има важна улога во креирањето на ликовите и нивната психологија (Учителот, Црквичето Четириесет маченици во Битола, Каде си тргнал, сине).

Драматизирани се повеќе негови дела: „Свадбата на Мара“ (1977, изведба на Народниот театар од Битола); „Грешниот Захарија“ (1986, изведба на Народниот театар од Битола, во режија на Љубиша Георгиевски); „Црквичето Четириесет маченици во Битола“ (2001, изведба на Народниот театар од Битола).

Во 2004 г. НУБ „Св. Климент Охридски“ во Битола ја објави „Персоналната библиографија на Владимир Костов“.

Носител е на наградите: „4 Ноември“ на градот Битола, „11 Октомври“, 1 Мај“, „Рациново признание“, „Ванчо Николески“

(Л. Г. Ј.)

Повеќе

Автор

ВЛАДИМИР КОСТОВ
22.IX 1932, Битола - 3.I 2023, Битола
современа книжевност
автор

Опус

Лица со маски. 1967. Скопје: Мисла (роман); Свадбата на Мара. 1968. Скопје: Мисла (роман); Игра. 1969. Скопје: Мисла (кратки раскази); Нов ум. 1970. Скопје: Мисла (роман); Ах, бре. 1970. Битола: Развиток (кратки раскази); Учителот. 1976. Скопје: Мисла (роман); Шумата ечеше (сказна, 1982); Каде си тргнал, сине. 1981. Скопје: Наша книга (роман за млади); Црквичето Четириесет маченици во Битола. 1984. Скопје: Мисла (роман); Вујко. 1984. Скопје: Наша книга (роман); Грешниот Захарие (новели, 1986); Тестамент. 1987. Скопје: Македонска книга (кратки раскази за млади); Чума. 1989. Скопје: Мисла (новели); Келешот (новели); Клетва. 1989. Битола: Мисирков (роман); Последното целивание. 1992. Скопје: Култура (роман); Грешка. 1992. Скопје: Мисла (краток роман); Тој ми кажа (роман за млади, 1992); Битолски триод. 1994. Битола: Мисирков (роман); Сениште во град Битола. 1994. Скопје: Мисла (роман); Маргарит. 1996. Скопје: Култура (кратки раскази); Солза за Мите. 1997. Скопје; Мелбурн: Матица македонска (роман за млади); Битолска хроника; Обителска трагедија. 1998. Скопје: Мисла (два кратки романи); Строгата школа на животот (кратки раскази за деца и младинци, 1998); Тане. 2000. Скопје: Мисла (роман); Хераклејски мозаик. 2003. Скопје: Pro Littera (збирка од 201 расказ); Воденички камен (раскази, 2008); Писание за Страшниот суд. 2011. Скопје: Матица македонска (роман); Битолијада. 2006. Скопје. Матица македонска (роман); Скршена чаша. 2007. Скопје: Југореклам, Pro Littera (раскази); Еврејчето Шами. 2007. Битола: В. Костов (проза за деца и младинци); Дива мисла. 2014. Скопје: Матица македонска (роман); Даровна (раскази, 2012); Декалог (драми, 2015) Битолски триод. 2004. Скопје: Југореклам, Pro Littera (роман).

Има овјавено и 2 драми.

Објавил поголем број трудови од областа на литературата, јазикот и театарот, меѓу кои се: Отстапување на битолскиот говор и неговиот стил, Поетскиот јазик на К. Рацин, Зборникот на Миладиновци и Рациновите „Бели мугри“, Личните заменки во битолскиот градски говор и др.

Библиографија

Старделов, Георги. (2011). Критика на деморализираниот ум“. Везилка, 2011

Здравковски, Цане. (2005). „Владимир Костов како извонреден познавач на психологијата на меѓучовечките односи“. Зборник -2,

Силјан, Раде. Омаж за Владимир Костов, https://www.mkd.mk/node/504228

Живот и дело

Опус

Библиографија

Контакт

Поважни линкови

ВЛАДИМИР КОСТОВ

Живот и дело

Опус

Библиографија

Контакт

Поважни линкови