Енциклопедија на македонската книжевност

Живот и дело

Поезијата на Љубен Ташковски е препознатлива по слободниот стих и по романтичарскиот тон, поради што од книжевните критичари бил наречен „македонски Бајрон“.

Македонски писател и поет.

Основно училиште завршил во Струмица, а гимназија во Кавадарци. Студиите ги започнал во Белград, а ги завршил во Скопје на Филозофскиот факултет, на катедрата за јужнословенска книжевност. Од 1958 до 1962 г. работел како новинар и професор по литература. По овој период работел како професионален писател, со што од 1976 г. се здобил со право на национална пензија. Бил член на Друштвото на писателите на Македонија од 1960 г.

Љубен Ташковски припаѓа на ...

Македонски писател и поет.

Љубен Ташковски припаѓа на втората генерација македонски повоени поети. Напишал десет збирки поезија и една стихозбика поезија за деца. Нагласениот лиризам, родољубивоста, но и универзалноста во идеите, се главните црти на неговата поетика.

Речиси целокупното поетско дело на Ташковски е поместено во изборот Од премудрата тишина (2008г.), дел од издавачкиот проект 130 тома македонска книжевност, каде што се преобјавени неговите стихозбирки: Катерина, Балада за јужното небо, Кукушанка, За нас нема збогум, Македонска рапсодија, Љубен во Америка, Мојата јужна љубов и Калинки. Татковинското и љубовното се цврсто испреплетени и се доминантен лајтмотив во поетскиот свет на Ташковски. За прв пат го воочуваме во сихозбирката Катерина (1958), кога оваа негова родољубивост прераснува во негова препознатлива поетичка црта. Неговата поезија носи многу свечени тонови, накитени и возвишени со по некој романтичарски тон. Трагиката и колективната траума, кои со градација се калемат во стиховите на Ташковски, се специфика на стихозбирката Балада за јужното небо, во која поетот ја третира егејската тема. Носталгијата, меланхолијата, но и восхитувачките слики на југот, доминираат и во стихозбирката Кукушанка. Потоа, со објавувањето на стихозбирката За нас нема збогум поетот како да влегува во наредната фаза од своето творештво, во која благодарение на врзаниот стих, неговата поезија добива универзална димензија. Овој меланж на татковинската и универзалната димензија во поезијата резултира со една поинаква и посложена метафизичка поетска преокупација, која се фокусира на борбата меѓу доброто и злото, кои во поезијата на Ташковски се симболично претставени преку светлината и темнината. Во неговата стихозбирка Љубен во Америка се воочливи „спонтаната лирска ерупција, непосредната и емотивно проткаена реч, луцидната досетка, метафоризираната остроумност“ (Тодоровски, 1979:282). Овие одлики се карактеристични и за стихозбирките кои подоцна ги објавил, во кои љубовта кон татковината и кон светот се толку проткаени, што и кога се најинтимни, во себе го носат и печатот на универзалното.

Љубен Ташковски е добитник на наградите: „Кочо Рацин“ што ја доделува издавачката куќа „Македонска книга“ и наградата „5-ти Ноември“ на градот Струмица.

Опус

Катерина. 1958. Скопје: Љубен Ташковски (поезија); Балада за јужното небо. 1960. Скопје: Љубен Ташковски (поезија); Кукушанка. 1962. Скопје: Љубен Ташковски (поезија); За нас нема збогум. 1967. Скопје: Љубен Ташковски (поезија); Македонска рапсодија. 1969. Скопје: Мисла (поезија); Љубен во Америка. 1970. Скопје: Македонска книга (поезија); Мојата јужна љубов. 1979. Скопје: Култура (поезија); Калинки. 1981. Штип: Илинден (поезија); Од Скопје до Чикаго, од Њујорк до Сантјаго. 1986. Скопје: Љубен Ташковски (поезија); Од премудрата тишина. 2008. Битола: Микена (поезија)

Библиографија

Тодоровски, Гане. 1979. „Љубен Ташковски: Љубен во Америка“ во Маѓепсан мегдан, Скопје: Култура, стр. 280-283; Митрев, Димитар. 1969. „Љубен Ташковски или татковинското како целосна инспирација“, Скопје: Мисла, стр. 5-13; Коцевски, Данило. 2008. „Поезијата на Љубен Ташковски“, Битола: НИД Микена, стр. 5-10.

Живот и дело

Опус

Библиографија

Контакт

Поважни линкови

ЉУБЕН ТАШКОВСКИ

Живот и дело

Опус

Библиографија

Контакт

Поважни линкови