Енциклопедија на македонската книжевност

Живот и дело

Поет, раскажувач и собирач на народни песни.

Првите песни ги објавил во в. „Бодил“ и „Барабан“ во 1905 г. додека се школувал во Солунската егзархиска гимназија, по што во 1916 г. емигрира во Софија каде влегол во кругот на напредната македонска емиграција. Заедно со Крум Ќулавков во текот на Првата светска војна го издава рачно испишаниот хумористичен весник „Весела Беласица“, во кој ги објавува песните: „Копнежи од Беласица“, „Современи разбирања“, „Мајска зима на Беласица“ и „Современи сфаќања“, но и литературни прилози, меѓу кои и записот „Нешто видено“, и неколку илустрации и карикатури. Васил Тоциновски пренесува дека Сребро Јанакиев под псевдонимот „Сиври – Синек“ објавил повеќе творби во весникот „К’во да е“ во текот на 1920 и 1921 г. кои засега се единствените негови познати книжевни прилози во целост. Тоа се стихотворбите „Есенски песни“, педесетте стихови со наслов „Писмо до Вардела“, „Есенски цигулки“, „Есенски настроенија“, поемата „Елвира“ во обем од 43 стиха организирани во четири песни, прозниот запис „Едно писмо“, стиховите „Стаканици“, песните „Стенси“, „Без заглавие“, „Пролетни песни“, „Пролет“ и „Бохемиска пролет“ (Тоциновски 2002: 125).

Темите и мотивите во поезијата на Сребро Јанакиев се сконцентрирани во спектарот на чувствувањето на едно палаво и нежно дете, размислувањата за љубовниот копнеж и за смислата на животот на еден резигниран младич. Документарноста, пак, како творечка тенденција е присутна во четиринаесетте записи за одделни времиња, настани и личности од историјата на родниот крај насловена како Тажни страници. (Д. А.)

Библиографија

Тоциновски, Васил. 2000. „По животните и творечки врвици на Сребро Јанакиев“, во: Јанакиев, Сребро. 2000; Веселиот скитник, Скопје: Државен архив на РМ и Матица македонска, стр. 5-67; Тоциновски, Васил. 2002. „Веселиот скитник“, во: Време сегашно, време минато. Скопје: Институт за македонска литература, стр. 113-134; Тоциновски, Васил. 2005. „Книгата ‘Тажни страници’“ на Сребро Јанакиев во: Нашите тажни страници. Скопје: Академски печат, стр. 41-55.

Живот и дело

Опус

Библиографија

Контакт

Поважни линкови

СРЕБРО ЈАНАКИЕВ

Живот и дело

Опус

Библиографија

Контакт

Поважни линкови