Енциклопедија на македонската книжевност

Живот и дело

Журналист, публицист, антологичар, преведувач. Еден од позначајните македонски дејци кои биле книжевно ангажирани во повеќе земји, покренувајќи го решавањето на македонското прашање.

Дипломирал правни науки на Московскиот универзитет. Работел како адвокат и бил секретар на Македонското друштво во Русе, понатаму бил трговски агент во Кавала, службеник во обвинителството во Софија.

Соработувал со неколку весници и списанија: Македонија (на ...

Соработувал со неколку весници и списанија: Македонија (на Коста Шахов), Македонија (во Загреб), Труд, Обзор, Славјанские известија, Балканско знаме. Неговите книги се објавувани во повеќе европски земји: Хрватска, Германија, Русија, Швајцарија, Бугарија, Словенија и Италија. Одржувал контакти со повеќе интелектуалци, меѓу кои биле Димитрија Чуповски и Крсте Мисирков. Се истакнал како издавач и редактор на дела со политичко-историски карактер („Pro domo sua!...“, „Зошто Германија и Австрија ѝ објавија војна на Русија“, „Мисли за Балканскиот сојуз“, „Русија и Балканот“, „Судбински моменти“, „Разрешување на словенското прашање“ и др.).

Капчев е првиот македонски издавач во Загреб. Во периодот 1898/1899 развил новинарска дејност што резултирала со издавање на весникот Македонија (во изворите се сретнува и како списание) и на книгата Македонија или гласот на робот. Весникот Македонија излегувал двапати месечно, а бил печатен на бугарски, хрватски и на германски јазик. Неговите цели биле научно и политичко разгледување на прашањето како „земјата Македонија“ да се здобие со самоуправа врз основа на заклучоците изнесени на Берлинскиот конгрес од 1878 г. Меѓу другото, тој се залагал и за одржување на „Македонски конгрес“ во Женева, на кој би учествувале реномирани европски научници, политичари и писатели. Книгата Македонија или гласот на робот, пак, доживеала две изданија, била отпечатена на хрватски и на бугарски јазик, со назнака дека била подготвена за печат и на француски и на германски јазик. Во неа биле претставени неговите статии објавувани во весникот Обзор, потоа проглас по повод злосторствата во врска со Виничката афера и други негови прилози кои повторно се однесувале на општествено-политичката состојба во Македонија. Во хрватската престолнина имал и неуспешен обид за издавање весник со името Македонец. Хрватскиот период на Капчев е најзначајниот во неговата долгогодишна дејност за афирмирање и решавање на македонското прашање преку автономија на земјата.

Интересно е да се спомне податокот дека во рамките на обемната монографија Куќа-музеј Цар-Ослободител Александар Втори во гр. Плевен (1907) внел поетска антологија во која вклучил повеќе познати автори: Иван Вазов, Август Шеноа, А. Браксаторис, А. А. Наврицкиј, К. Акскаков и др.

Убеден панславист, Капчев се потврдува како одличен познавач на политичката состојба во Европа, на нејзината историја, дипломатија, литература, право и економија, па со критичен тон изнесувал сопствени констатации и предлози. (С. К.)

Опус

Makedonija ili glas roba. 1898. Tisak Antuna Scholza. Zagreb; „Glas iz Makedonije“. 1898. Obzor br. 168, стр. 1-2; Дѣлото Шарлъ-Жанъ прѣдъ сѫдътъ, под редакцията на Г. Капчев. 1906; Кѫща-музей Царъ-освободителъ Александъръ Втори въ гр. Плѣвенъ. 1907. София; Зеленитѣ гори – Скобелески паркъ. 1907. София; Турецкое ‘наслѣдство’ и Мiровая война. 1917. Стокгольмъ; Голем број објави во весниците: Гласъ Македонски и Балканско знаме.

Библиографија

Калоѓера, Горан. 2008. Хрватско-македонски литературни врски. Скопје: Современост; Тоциновски, Васил. 2010. Предвесници. Скопје: Академски печат; Андонов-Полјански, Христо. 1981. Одбрани дела, Кн. 2. Скопје: Мисла; Јовановски, Благоја. 2008. „Дејноста и врските на Георги Капчев“. Македонски глас бр. 54, стр. 20.

Живот и дело

Опус

Библиографија

Контакт

Поважни линкови

ЃОРЃИ КАПЧЕВ

Живот и дело

Опус

Библиографија

Контакт

Поважни линкови