ОХРИДСКИ ГЛАГОЛСКИ ЛИСТОВИ

Опис на делото

Средновековен книжевен ракопис, односно фрагмент од ракопис, пишуван кон крајот на X или почетокот на XI век. Содржи два пергаментни листови напишан со глаголско писмо од еден книжевник. Според правописните и јазичните особености се констатира дека потекнува од Охридската книжевна школа. Содржинската структура упатува дека листовите се фрагмент од изборно евангелие. Во откриените листови од ова евангелие се наоѓаат евангелски четива (Лука 24,19-35 и Јован 1,35-42; 3,30-33; 20,19-31; 2,1-7) наменети за вторник, среда и сабота од Светата недела, за првата недела по Велигден и за понеделникот од втората недела по Велигден. Листовите се пронајдени од страна на Виктор Григорович во 1845 г. во Охрид, според што го носат називот Охридски глаголски листови. Се чуваат во Државната библиотека во Одеса во збирката на В. Григорович, сигн. 1/2 (532).  (С. П.-Ѓ.)