СЛЕПЧЕНСКИ АПОСТОЛ

Опис на делото

Средновековен книжевен ракопис пишуван во втората половина на XI век. Содржи 154 пергаментни листови напишани со кирилско старословенско писмо од двајца книжевници. Слепченскиот апостол е еден од најстарите словенски апракосни апостоли којшто служи како извор за изучување на старословенскиот јазик. Содржинската структура на ракописот се состои од четива од полниот апракосен апстол, односно четива од делата и посланијата апостолски по редослед на годишната служба и месецослов, во кој месеците се запишани со старите словенски називи. Палимпсестниот дел од ракописот содржи слова и житија од византиски црковни писатели. Ракописот првично се наоѓал во Слепченскиот манастир „Св. Јован Крстител“, според што е именуван. Оттаму е изнесен во повеќе делови, при што најголем дел, 136 листа, од ракописот се чуваат во Руската национална библиотека во С. Петербург, сигн. F.п.I.101 и F.п.I. 101ᵃ. Во библиотеката на Руската академија на науките во С. Петербург се чува еден лист, сигн. № 24.4.6, додека уште 6 листа се чуваат во Руската државна библиотека во Москва, сигн. Григ. 14/M.1696. Во Централната библиотека на Украинската академија на науките во Киев се чуваат 2 листа, сигн. ДА/п.25, додека 9 листа се чуваат во Народната библиотека „Иван Вазов“ во Пловдив, сигн. № 25/62. (С. П.-Ѓ.)