ХИЛЕНДАРСКИ ЛИСТОВИ

Опис на делото

Средновековен книжевен ракопис пишуван во третата четвртина на X век. Содржи два пергаментни листови коишто се едни од најстарите зачувани споменици што се напишани со кирилско старословенско писмо. Според правописните и јазичните особености на овој фрагмент се смета дека ракописот настанал во источниот дел на Македонија. Најверојатно листовите биле дел од зборник со поученија на Св. Кирил Ерусалимски, сличен на Синодалниот руски препис од XII век, бидејќи содржат дел од старословенскиот превод на огласителните поуки на Св. Кирил Ерусалимски. Во листовите е содржан крајот на третото и почетокот на четвртото слово ‒ „За значењето на светото таинство крштение“ и  „Толкување на Посланието на апостол Павле до Колосјаните“. Хилендарските листови се пронајдени во пиргот на „Св. Сава“ во Хилендарскиот манастир, во 1844 г. од страна на Виктор Григорович, и се именувани според местото каде што се пронајдени. Се чуваат во збирката на Григорович во Државната научна библиотека во Одеса, сигн. Р 1/533.  (С. П.-Ѓ.)