ШАФАРИКОВ ТРИОД

Опис на делото

Средновековен книжевен ракопис пишуван кон крајот на XII или почетокот на XIII век. Содржи 157 пергаментни листови напишани со текст со кирилско старословенско писмо, а застапени се и остатоци од глаголски текст. Според правописните и јазичните особености се констатира дека ракописот е произлезен од Охридската книжевна школа. Според содржинската структура претставува полн триод без поделба на посен и цветен циклус, а содржи и упатства од црковниот устав. Ракописот започнува со VII песна од канонот на утрената молитва во саботата од Сиропусната недела, а завршува со канонот на утрената молитва во Воскресната недела. Застапени се служби за седмиците од Великиот пост и поствелигденскиот период, односно службите за: Сиропусната недела, седумте недели од Великиот пост, Томина недела, Неделата на Мироносците, Неделата на Самарјанката, Неделата на слепородениот, Неделата на Светите Отци и Неделата на Педесетницата. Ракописот му припаѓал на Павел Шафарик, поради што во науката е познат како Шафариков триод. Се чува во Руската национална библиотека во Санкт Петербург, сигн. F. п. I. 74. (С. П.-Ѓ.)