КИЕВСКИ ДАМАСКИН

Опис на делото

Средновековен книжевен ракопис пишуван кон крајот на XVI век. Содржи 247 хартиени листови напишани од еден книжевник со кирилско старословенско писмо, истиот што го пишувал и Крнинскиот дамаскин. Всушност, ракописот е втор дел од двотомниот Дамаскин, додека Крнинскиот ракопис е првиот дел. Овие два ракописи заедно претставуваат една целина ‒ полн словенски превод од зборникот „Сокровиште“ на Дамаскин Студит. Во содржината на Киевскиот дамаскин се наоѓаат шеснаесет слова од македонски превод од Зборникот. Секое слово започнува со општ дел, а потоа се конкретизира темата што се развива со помош на голем број споредби и цитати од Стариот и Новиот завет, како и од книгите на Светите отци, со фрагменти од трудовите на Анастасие Синајски, Исидор Пелусиотски, со апокрифи и со друга достапна литература. Во ракописот се наоѓаат словата бр. 21 ‒ 36, додека првите дваесет слова се наоѓаат во Крнинскиот ракопис. Во Киевскиот дамаскин се застапени повеќе записи од самиот препишувач, како и записи пишувани во подоцнежен период од други поневешти раце, со многу грешки, и доста нечитливи. Овие невешто напишани записи упатуваат на тоа дека ракописот служел како учебник, при што некои ученици се обидувале да препишуваат и да ги подобрат своите вештини. За потеклото на ракописот, постојат две претпоставки ‒ според записот на последната страница, веројатно настанал во Топличкиот манастир, но поверојатно е дека преписот бил направен во кичевскиот манастир „Св. Богородица Пречиста“. Ракописот во XIX век бил однесен во Киев од архимандрит Анатонин Капустин, а денес се чува во Институтот за ракописи при Националната библиотека во Украина под наслов Слова монаха Дамаскина ф. 301, сигн. 290 п. (С. П.-Ѓ.)