КРНИНСКИ ДАМАСКИН

Опис на делото

Средновековен книжевен ракопис пишуван кон крајот на XVI век. Содржи 281 хартиени листови напишани од еден книжевник со кирилско старословенско писмо, истиот што го пишувал и Киевскиот дамаскин. Всушност, ракописот претставува прв дел од двотомниот Дамаскин, чијшто втор дел е именуван како Киевски дамаскин. Овој двотомен Дамаскин е еден од најцелосно зачуваните преписи на македонскиот превод на дамаскинот. Во неговата содржинска структура се застапени првите дваесет слова од македонскиот превод на зборникот „Сокровиште“ на Дамаскин Студит, направен од епископот прилепски и пелагониски Григориј. Останатите шеснаесет слова се наоѓаат во вториот дел (Киевскиот дамаскин). Пронајден е во 1956 г. во манастирот „Св. Богородица Пречиста“ во с. Крнино, според што и го добил името. Се чува во Институтот за македонски јазик „Крсте Мисирков“ во Скопје, сигн. № 594. (С. П.-Ѓ.)