МАКЕДОНСКО ЕВАНГЕЛИЕ НА ПОП ЈОВАН

Опис на делото

Средновековен книжевен ракопис пишуван кон крајот на XII или почетокот на XIII век. Содржи 133 пергаментни листови напишани со кирилско старословенско писмо од книжевникот поп Јован, чие име е забележано на маргините на л. 74 об. Според правописните и јазичните особености ракописот е произлезен од Кратовската книжевна школа. Според содржинската структура, овој ракопис е кратко изборно евангелие „апракос“. Текстот започнува со читањето од третата недела по Велигден. Застапени се читања за секој ден по Пасха до Духовендскиот понеделник, каде што се наоѓа текст од Јовановото евангелие. Потоа следуваат евангелски четива за сабота и недела од Духовден до крајот на Великиот пост, читањата од Страдалните евангелија во Страсната недела и читањата за Утрената велигденска литургија. По евангелските четива се наоѓа синаксар кој не е целосен, бидејќи започнува со 1 септември, а завршува со 23 декември. Во Македонското евангелие на поп Јован се јавуваат и повеќе записи од пишувачот на евангелието, како и еден краток грчки запис од подоцнежен период. Пронајден е од страна на Антун Михановиќ во Македонија, во периодот кога престојувал во Солун како австриски конзул. Се чува во Хрватската академија на науките и уметностите во Загреб, сигн. III c 1.   (С. П.-Ѓ.)