Енциклопедија на македонската книжевност

Живот и дело

Книжевник и монах, следбеник на Светиклиментовата ораторско-прозна традиција од Охридската книжевна школа, протагонист на македонско-византиските и македонско-руските духовни и книжевни врски. Духовната и книжевната дејност ја почнал во Македонија, се образувал во Константинопол и таму го стекнал авторитетот на „филозоф“, а блиската духовна и книжевна соработка со рускиот митрополит Георгиј II придонела во 1062 година да замине во Русија како негов виш служител. Неговата книжевна дејност е зачувана само од периодот кога работел во Русија, а и затоа преписите на неговите дела се среќаваат само во руската ракописна традиција од XV и XVI век. Како директен следбеник на Светиклиментовата творечка традиција тој напишал циклус од седум поучни слова, во чие поглавје е запишано дека се авторство на Григориј Филозоф. За секој ден од седмицата било наменето да се чита по едно од словата, и тоа во деновите од црковната година кога не се користат словата од триодниот и од минејниот панегирик, или хомилијар: во недела – Слово за Христовото воскресение; во понеделник – Слово за ангелите; во вторник – Слово за св. Јоан Крстител; во среда – Слово за св. Богородица; во четврток – Слово за св. Апостоли; во петок – Слово за светиот Крст и во сабота – Слово за спомен на мртвите. Во зачуваните преписи обично се застапени шест слова, зашто седмото недостасува – а во некои и се среќава мешање на неговото име со св. Константин-Кирил Филозоф . (И.В.)

Опус

Оригинални творби:

Циклус од седум Поучни слова: Слово за Христовото воскресение; Слово за ангелите; Слово за св. Јоан Крстител; Слово за св. Богородица; Слово за св. Апостоли; Слово за светиот Крст; Слово за спомен на мртвите.

Библиографија

Велев, Илија. 2014. Историја на македонската книжевност. т. 1.Средновековна книжевност (IX-XIV век). Скопје: Гирланда, стр. 445-446; Поп-Атанасов, Ѓорги, Велев, Илија и Јакимовска-Тошиќ, Маја . 2004. Творци на македонската литература (IX-XVIII век). Скопје: ИМЛ, стр. 39-40; Турилов, Анатолий А. 1987. „Григорий Философ – неизвестен книжовник от XI век с крупно дело в старобългарската и староруската литература“. За буквите. Кирило-Методиевски вестник, 9, април-май, 13, стр. 7.

Живот и дело

Опус

Библиографија

Контакт

Поважни линкови

ГРИГОРИЈ ФИЛОЗОФ

Живот и дело

Опус

Библиографија

Контакт

Поважни линкови