Енциклопедија на македонската книжевност

Живот и дело

Неговата поезија ја следи традиционалната версификациска рамка и мотивски се движи по интимното и роднокрајното, а најголем исчекор прави во доменот на поемата.

Поет и преведувач од третата генерација повоени македонски писатели. Неговата поезија ја следи традиционалната версификациска рамка и мотивски се движи по интимното и роднокрајното, а најголем исчекор прави во доменот на поемата.

Завршил Филозофски факултет (книжевност) во Скопје. Бил долгогодишен главен и одговорен уредник на весникот „Млад борец“, а до пензионирањето работел како уредник во Радио Скопје. Член на ДПМ од 1959 година. Се пројавува и како плоден преведувач на поезија од руски, бугарски и српски јазик. Препејувач е на поетски книги од Булат Окуџава, Роберт Рождественски, Андреј Вознесенски, Матс Траат, Христо Смирненски и за својата преводна дејност е добитник на наградата „Кирил Пејчиновиќ“. Автор е на антологија на узбечка поезија од XIV до XX век под наслов Проѕирна река (1988) и на антологија Африкански поети за сонцето и за слободата (1976).

Дебитира во 1957 г. со збирката Меѓу двата брега во која се исцртуваат основните мотивски координати на неговото поетско творештво: роднокрајниот релјеф, меланхолијата, семејната историја и митологија. Дури и во најинтимните автобиографски песни тој е обземен од идентитетската потврда на своето национално чувство, најчесто во архаично-романтичарски егзалтиран манир и со вдахновен родољубив занес. Во следните стихозбирки, Крај тешките води (1962), Поле, под него морето (1966), Отимања (1969) и Судба сончогледова (1971) ги воспева клучните историски мигови од опстојбата на македонскиот народ и им посветува вдахновени стихови на топосите поврзани со нив, на тој начин исцртувајќи поетска идентитетската мапа на својот роден крај и на својата земја. Посебно се истакнува неговиот однос кон јазикот и кон фолклорот, што доаѓа до израз во книгите Куршуми низ времето (1976) и Светлосната нишка (1996). Во првата тој создава своевидни поетски афоризми врз база на народните поговорки кои резонираат со современиот контекст, а во втората целосно ѝ се посветува на македонската народна песна како сокровиште на националниот спецификум. Спомнатата стихозбирка, како и стихозбирката Доживотни пленици (1988) ја потврдуваат поетичката определба на Стојменски за жанрот поема, кој интензивно го негува во својата зрела фаза.

Тој се пројавува и како поет за деца со стихозбирките Деноноќно сонце (1977) и Види, види кој ни дошол (1980). (С. С.-Е.)

Повеќе

Автор

ЉУПЧО СТОЈМЕНСКИ
20.ХI 1931, Штип - 10.I 2007, Скопје
современа книжевност
автор

Опус

Меѓу двата брега. 1957. Скопје: Култура (поезија); Крај тешките води. 1962. Скопје: Кочо Рацин (поезија); Поле, под него морето. 1966. Скопје: Кочо Рацин (поезија); Отимања. 1969. Скопје: Мисла (поезија); Вистини и сништа. 1970. Скопје: Мисла (поезија); Судба сончогледова. 1971. Скопје: Нова Македонија. Заедница за издавачка дејност (поезија); Куршуми низ времето. 1976. Скопје: Култура (поезија); Деноноќно сонце. 1977. Скопје: НИК Наша книга (поезија за деца); Види, види кој ни дошол. 1980. Скопје: Култура (поезија за деца); Доживотни пленици. 1988. Штип: Друштво за наука и уметност (две поеми); Поеми. 1988. Скопје: Наша книга; Светлосната нишка. 1996. Скопје: Мисла (поема).

Библиографија

Алексиев, Ацо. 1957. „Писмо упатено до иднината“, Млада литература бр. 5-6, стр. 74-83; Вангелов, Атанас. 1972. „Афирмација на емоцијата“, Разгледи бр. 1/1972, стр. 103-105; Најдоски, Ѓорѓија. 1969. „Љупчо Стојменски или автохтоно поетско создавање“, предговор во: Стојменски, Љупчо. Отимања. Скопје: Мисла, стр. 5-9; Тодоровски, Гане. 1957. „Љупчо Стојменски: Меѓу два брега, Култура, Скопје 1957 // Разгледи, год. IV, бр. 7 (85) (24 март 1957), стр. 7; Чаловски, Тодор. 2002. „Поезија што верува и што бара да ѝ се верува“, во: Прочит: Литературни записи, критики и есеи. Скопје: Штрк, стр. 152-154; Чаловски, Тодор. 2002. „Стихување на шегобијното и убавото“, во: Прочит: Литературни записи, критики и есеи. Скопје: Штрк, стр. 215-217.

Живот и дело

Опус

Библиографија

Контакт

Поважни линкови

ЉУПЧО СТОЈМЕНСКИ

Живот и дело

Опус

Библиографија

Контакт

Поважни линкови