Енциклопедија на македонската книжевност

Живот и дело

Творечкиот свет на Видичевски е секогаш инспириран од родниот град Охрид и може да се смета како своевидна роднокрајна ангажирана поезија, која во себе го содржи родољубивиот импулс.

Поет, раскажувач, романсиер и драмски писател. Творечкиот свет на Видичевски е секогаш инспириран од родниот град Охрид и може да се смета како своевидна роднокрајна ангажирана поезија, која во себе го содржи родољубивиот импулс. Завршил Филозофски факултет во Скопје. Бил основач на Историскиот архив во Охрид, на Радио Охрид, на манифестацијата „Прличеви беседи“ и бил еден од иницијаторите за формирањето на музичко-драмскиот фестивал „Охридско лето“. Бил и вршител на должноста директор на Градската, подоцна преименувана во Народна и универзитетска библиотека „Григор Прличев“ во Охрид, а учествувал и во осмислувањето на фестивалот „Струшки вечери на поезијата“. Во поезијата дебитира со стихозбирката Сини питоми утрини во 1959 година и истата година станува член на ДПМ.

Потоа ги објавува поетските книги Вечерен пејзаж од градот, Песни за потопот, Кажување на задоцнетиот пророк, Вие и Биље крај езерото. Неговата поезија има исповеден карактер и претставува рефлекс на неговите искуствени преокупации. Често како лирски мотиви се појавуваат историски настани и трауматични судбини, што на неговиот поетски профил му придодаваат силна родољубива црта. За него е напишано дека е „реминисцентен писател, длабоко и очајно замислен над проблемите на своето време, над иднината над која се напластиле темните облаци кои со сета своја жестокост се закануваат да ги уништат драгите и топли нешта“ (Банар 1988: 476). Особено профетска и ангажирана интонација носат стиховите од стихозбирката Вие, која се појавува во првата декада на XXI век, во време кога авторот е веќе во висока зрелост и преку својот стих реагира на општествените промени и етичките недоследности. Поезијата на Видичевски е поврзана со охридскиот пејзаж, така што во неа доминираат „природните езерски убавини, прошетките низ Малесија и Дримкол, младешките доживувања на прекрасната Галичица. Сето тоа се врежало во поетовата душа, та низ ткаежот на стиховите најизразито се остварува во стихозбирката Вечерен пејзаж над градот, за која Матеја Матевски ќе напише дека ‘е изразито медитерански обоена книга, со лирска атмосфера полна со таинственост, соопштена со модерен јазик’“ (Силјан 2018).

Видичевски има значаен влог во македонската проза преку своите романи и раскази за деца и млади. Неговиот роман Големата шума долг период бил дел од задолжителната лектира во основното образование, а исто така по него е снимена и ТВ-серија од десет епизоди. Автор е на збирката раскази Заробеници на вечерните игри и на драмите Бреговите се немирни и Балада за орканата.

Во 2018 година Видичевски добива значајни награди за својот книжевен опус и дело: „Книжевен жезол“ на ДПМ и највисокото општинско признание на Охрид „Св. Климент Охридски“. (С. С.-Е.)

Повеќе

Автор

ВИДОЕ ВИДИЧЕВСКИ
8. I 1972, Охрид - 12. ХII 2020, Охрид
современа книжевност
автор

Опус

Сини питоми утрини. 1959. (поезија); Бреговите се немирни. (Драма изведена 1961, а печатена 1963); Балада за орканата. (Драма печатена 1964, а изведена 1968); Големата шума. 1970. Скопје: Мисла (роман, прв дел); Големата шума. 1986. Скопје: Мисла (роман за деца во два дела); Вечерен пејзаж од градот. 1988. Скопје: Македонска книга (поезија); Таинствени води. 1990. Скопје: Детска радост (роман за деца); Заробеници на вечерните игри. 1993. Скопје: Матица македонска (раскази); Времето на црвените рози. 1994. Скопје: Детска радост (роман за млади); Песни за потопот. 2000. (поезија); Приказни за Дамјана. 2002. Скопје: Детска радост (раскази за деца); Кажување на задоцнетиот пророк. 2003. Скопје: Силсонс (поезија); Вие. 2009. Скопје: Дијалог (поезија); Билје крај езерото. 2011. Струга: Медитеранска академија „Браќа Миладиновци“: Ирис (поезија); Новите дотеци. 2018. Скопје: Дијалог (поезија).

Библиографија

Банар, Славе. 1988. „Пејзажи на душата и природата“ Стремеж. Год. 32, бр. 5, стр. 475-477; Белевска, Александра. 2014. „Видое Видичевски: еден од доајените на ДПМ“. Стожер. Год. XVIII, бр. 118, стр. 18-21; Матевски, Матеја. 1989. „Пред вечерниот пејзаж над градот (Видое Видичевски: Вечерен пејзаж над градот, Македонска книга, Скопје 1988)“. Разгледи 5-6, стр. 471-472; Матевски, Матеја. 2009. „Песната како мементо: Видое Видичевски, Вие, Дијалог, Скопје 2009“. Синтези 16, стр. 70-71; Силјан, Раде. 2018. „Видое Видичевски: поет исповедник“. Публицитет.мк https://publicitet.mk/vo-potraga-po-trajnata-ubavina/item/8114-rade-siljan-vidoe-vidichevski-poet-ispovednik (пристапено на 10.11.2023); Старделов, Георги. 2009. „Новата ангажирана песна: Видое Видичевски, Вие, Дијалог, Скопје 2009“. Синтези 16, стр. 72-74.

Живот и дело

Опус

Библиографија

Контакт

Поважни линкови

ВИДОЕ ВИДИЧЕВСКИ

Живот и дело

Опус

Библиографија

Контакт

Поважни линкови