Енциклопедија на македонската книжевност

Живот и дело

Неговиот раскажувачки стил изобилува со долги описи, емотивни експресии и редуцирани, строги дијалози што ја создаваат специфичната, психолошка естетика на неговиот израз

македонски поет, раскажувач, книжевен критичар, преведувач и сценарист. Неговото творештво во историјата на македонската литература има посебно место, затоа што со него започнува развојот на современиот македонски расказ. Збирката раскази Растрел (1947) е првата збирка раскази во македонската современа литература.

Роден е во Скопје, во сиромашно, печалбарско семејство. Се школувал во вечернит...

Роден е во Скопје, во сиромашно, печалбарско семејство. Се школувал во вечерните училишта и имал скромно институционално образование. Работел како трговски помошник и како книговодител во железничко-транспортната дирекција.

Низ годините творештво го изградил својот личен стил и уметнички израз, во опус и тематска широчина кои го надминале недостигот од формалното образование. Неговиот уметнички профил е сплет на пошироки интереси – раскажувач, есеист, истражувач и литературен критичар, театарски и културен работник, уредник на културни рубрики и член на неколку писателски друштва. Бил прв лектор во весникот Нова Македонија и уредник на сп. Нов ден и Современост. Бил член на Друштвото на писатели од 1947 година. Автор е на неколку сценарија за филм: Жито за народот (1947), Солунските атентатори (1961), Под исто небо (1964) и соработник при подготовката на сценаријата за филмовите Мементо (1967) и Републиката во пламен (1969).

Автор е на неколку збирки раскази. Неговиот раскажувачки стил изобилува со долги описи, емотивни експресии и редуцирани, строги дијалози што ја создаваат специфичната психолошка естетика на неговиот израз. Не случајно, еден од неговите најдобри остварувања, расказот „Човек на покривот“ се смета за најава на новиот модернистички расказ во македонската литература.

Творечки опус на Бошковски се проширува со единствениот негов роман Солунските атентатори (1962), кој историски се надоврзува на поголемата приказна за овој историски настан, претходно прикажана во романот Пустина од Ѓорѓи Абаџиев (1961). Со внимателно, суптилно доближување на историјата, Бошковски креативно ги оживотворува главните протагонисти на историскиот настан од 1903 г., давајќи им психолошка длабочина и историска автентичност. (Т. Ќ.)

Опус

Растрел. 1947. Скопје: Кочо Рацин (раскази); Бегалци. 1949. Скопје: НОПОК (раскази); Блокада. 1950. Скопје: Државно книгоиздателство на Македонија (раскази); Луѓе и птици. 1950. Скопје: Кочо Рацин (раскази); Солунските атентатори. 1961. Скопје: Кочо Рацин (роман); Оплеменета игра. Театарски разгледи. 1957. Скопје: Кочо Рацин (книжевни осврти); Македонска драма. 1961. Скопје: Кочо Рацин (книжевни осврти).

Библиографија

Друговац, Миодраг. 1986. Повоени македонски писатели. Скопје: Наша книга.; Митрев, Димитар. 1955. „Јован Бошковски: Луѓе и птици“. Современост, 5, бр. 4: 275-286.; Зографов, Христо. 1956. „Анализа на два расказа од современата македонска литература: Луѓе и птици од Јован Бошковски и Изложба од Блаже Конески“. Литературен збор, бр. 2: 85-97.; Мицковиќ, Слободан. 1968. „За творештвото на Јован Бошковски (1920 – 1968)“. Разгледи, X, бр. 14: 1575-1581.

Живот и дело

Опус

Библиографија

Контакт

Поважни линкови

ЈОВАН БОШКОВСКИ

Живот и дело

Опус

Библиографија

Контакт

Поважни линкови