Поетеса, пијанистка и музиколог. Таа е досега најмладиот добитник на престижната награда „Браќа Миладиновци“ за најдобра поетска збирка објавена помеѓу две изданија на фестивалот Струшки вечери на поезијата во 2021 г. за збирката Двоумење.
Како дипломиран пијанист ја дооформува академската кариера со магистерски студии на Катедрата за музикологија на Универзитетот во Болцано, Италија, како и на Катедрата за музичка интерпретација и композиција на Факултетот за музичка уметност при УКИМ – Скопје. Член е на дуетот „Алембик“ (заедно со Виктор Танасковски) кое изведува музичко-поетски перформанси, компонира, снима записи за електронските медиуми и учествува на бројни поетски и музички фестивали и други настани.
Како поетеса е забележана уште при објавувањето на првата стихозбирка Тие во 2017 г., за која ја добива наградата „Игор Исаковски“ што ја доделува издавачката куќа „Блесок“ за најдобар поетски ракопис. По две години оваа стихозбирка е преобјавена во издавачката куќа ПНВ Публикации. Во 2020 г. се појавува втората стихозбирка на Дамјановски Двоумење, овенчана со престижната награда „Браќа Миладиновци“. Во 2022 г. Дамјановски објавува стихозбирка со наслов Почнуваме, во која е направен избор од првите збирки Тие и Двоумење, а истата година се појавува и нејзината трета стихозбирка Тријажа, во која поетесата експериментира со пронижување на повеќе различни јазици.
Поезијата на Ива Дамјановски се карактеризира со автентичен сензибилитет и стил. Таа е потенцирано музикална, со прецизен ритам и возбудлива интонација и со особено игрив и инвентивен однос спрема јазикот. Во неа провејува духот на една нова генерација поставена пред закани и опасности, така што мотивскиот спектар опфаќа пркос и револт, апокалиптичност, екологија, технократија...
Застапена е во низа антологии и списанија за книжевност и нејзината поезија е преведена на неколку светски јазици. Добитник е на третата награда на конкурсот „Антево слово“ за најдобра необјавена песна во 2021 г., а во 2022 г. е и лауреат на истиот поетски конкурс. Во 2021 г. ја добива и Специјалната награда на меѓународниот натпревар Castello di Duino во Трст за најдобра необјавена песна со значајна социјална или хуманистичка порака. (С. С.-Е.)