РАДОМИРОВО ЕВАНГЕЛИЕ

Опис на делото

Средновековен книжевен ракопис пишуван во средината на XIII век. Содржи 182 пергаментни листови напишани со кирилско старословенско писмо од повеќе раце. Како главен препишувач се јавува книжевникот Радомир, најверојатно истиот Радомир којшто го напишал и Радомировиот псалтир од збирката на Зографскиот манастир. Неговото име се открива преку запис оставен на л. 169 об. Останатите книжевници се среќаваат во мали делови. Според правописните и јазичните ососбености ракописот е произлезен од Кратовската книжевна школа. Според содржинската структура претставува полн апракос. Текстот во ракописот започнува од евангелието во средата од втората недела по Велигден и прекинува со евангелието на утрената на Великипеток. Радомировото евангелие се чува во Хрватската академија на науките и уметностите во Загреб, во збирката на Михановиќ бр. 6, сигн. III в 24. (С. П.-Ѓ.)