ТИКВЕШКИ ЗБОРНИК

Опис на делото

Средновековен книжевен ракопис пишуван во втората половина на XV век. Содржи 123 хартиени листови напишани со кирилско старословенско писмо од еден книжевник. Според правописните и јазичните особености ракописот произлегол од Кратовската книжевна школа. Според содржинската структура претставува мешан зборник во чиј состав се забележува отстапување од строгите теолошки и религиозни содржини и доближување до народните претстави и толкувања на настаните од библиската историја. Во содржината на овој зборник се изделуваат апокрифни старозаветни и новозаветни слова за: Аврам, Сара, Исак Исмаил, Светата Троица, за смртта на Аврам, за прекрасниот Јосиф, слово за царот Давид и составувањето на псалтирот, за лошите жени, за Воздвижение на Богородица, Видение на апостолот Павле, Марта ‒ сестрата на Лазар, Составувањето на евангелието, Слово за овошката, потоа хагиографии за: Павле Кесариски, Марија Египетска, Св. Меркуриј и Св. Ефрем, 20 текстови од Физиологот, средновековни раскази за: Теофана Крчмарката, Еладиј, Езоп, Мелентиј пустиножителот и Евстариј, препис од т.н. „Солунска легенда“ итн. Овој ракопис како наследство од својот прадедо го добил Христо Андонов од с. Мрзен, Тиквешко, којшто потоа ѝ го предал на Солунската гимназија. Оттаму го презел Никола Начов кој го препишал и опишал, по што го предал на Народната библиотека во Софија, каде што се чува и денес, под сигн. № 677.   (С. П.-Ѓ.)