АЛЕКСАНДАР АЛЕКСИЕВ

Живот и дело

АЛЕКСИЕВ, АЛЕКСАНДАР (Кочани, 20.VIII 1929 – 22.II 2006, Скопје), романописец, театролог, критичар, книжевен историчар, преведувач, поет, новинар.

Гимназиско образование завршува во Штип, Филозофски факултет, група Македонски јазик и литература во Скопје. Бил на студиски престој за изучување на полскиот јазик и литература во Варшава.

Од 1953 г. работи како новинар во Културната редакција на Нова Македонија, а во 1954 г. се ...

АЛЕКСИЕВ, АЛЕКСАНДАР (Кочани, 20.VIII 1929 – 22.II 2006, Скопје), романописец, театролог, критичар, книжевен историчар, преведувач, поет, новинар.

Гимназиско образование завршува во Штип, Филозофски факултет, група Македонски јазик и литература во Скопје. Бил на студиски престој за изучување на полскиот јазик и литература во Варшава.

Од 1953 г. работи како новинар во Културната редакција на Нова Македонија, а во 1954 г. се префрла во Радио Скопје каде што останува до 1978 г. на повеќе работни позиции: уредник на Редакцијата за култура, главен уредник на Секторот за култура, главен уредник на програмите на Радио Скопје и директор на Радио Скопје. Потоа е назначен за директор на Архивот на Македонија и за професор на Факултетот за драмска уметност во Скопје. Бил и долгогодишен главен и одговорен уредник на сп. Современост. Ја извршувал функцијата претседател на Сојузот на новинарите на Македонија и Југославија и членувал во ДПМ од 1959 г. Во родното Кочани го основал Фестивалот на аматерски и алтернативни театри и учествувал во неговата работа.

Литературната дејност ја започнал во 50-ите г. објавувајќи поезија, проза и литературна критика во весниците и сп. Млад борец, Млада литература, Разгледи, Современост и др. Подоцна неговото внимание ќе биде насочено кон проучување на почетоците на македонската драмска литература и театар. Ги редактирал собраните дела на Војдан Чернодрински во пет тома (1975) и избраните дела на Васил Иљоски во три тома (1979).

Бил затворен една година на Голи Оток, за што пишува во двата објавени романи Деветте круга на пеколот (2000) и Чардак ни  на небо ни на земја(2003) и во недовршениот роман Татковината е онаму каде што нè сакаат, чии делови се објавени постхумно во сп. Синтези (2007). Биофикциските романи на Алексиев, првобитно замислени како трилогија која останала незавршена поради смртта на авторот, изобилуваат со реминисценции и имагинарни стории од неговиот трнлив животен пат кој уште во младоста го носи во прегратките на „деветте круга на голооточкиот пекол“. Во нив конкретно се посочени одредени немили настани, но и личности кои биле зафатени од виорот на невремето, со што молкот за апсурдните репресии на режимот е прекинат заедно со падот на целиот некогашен тоталитарен систем, за што (покрај него) пишуваат и авторите: Стојан Ристески, Димче Најчески, Никола Кљусев, Томе Арсовски, Викторија Гаго и др.

Добитник е на наградите: „11 Октомври“, „Војдан Чернодрински“ и „Златно перо“ за преведувачката дејност. (Ј. М.-Г.)