ЛЕСНОВСКИ КОВАЧЕВИЌЕВ ПРОЛОГ

Опис на делото

Средновековен книжевен ракопис пишуван во периодот меѓу 1330/1340 година. Содржи 221+1 пергаментен лист напишани со кирилско старословенско писмо од двајца книжевници ‒ првиот дел од ракописот (л. 106-221) е напишан од анонимен книжевник, додека вториот дел од ракописот (л. 106-221) е напишан од Станислав Лесновски. Според правописните и јазичните особености ракописот е произлезен од Лесновскиот книжевен центар. Ракописот според содржинската структура е од типот на целосните пролози ‒ ги содржел составите за сите месеци и денови преку целата година. Содржински се совпаѓа со Лесновскиот пролог  од 1330 година. Во него се застапени помени на руски и јужнословенски светители. Присуството на руски светители посочува дека предлошката на овој ракопис бил руски преведен текст. Текстот почнува со дел од проложните состави за 16 септември, а завршува со 25 јули, со спомените на Св. Ана и на Преп. Евпазија. Застапено е и краткото житие на Св. Гаврил Лесновски, што претставува втор досега познат препис по тој во Лесновскиот пролог од 1330 г. Се чува во Народната библиотека во Белград во збирката на Љубомир Ковачевиќ, сигн. рс. 705. (С. П.-Ѓ.)